Убачыўшы хуткі поспех моднага парку ў Капенгагене, менскі прадпрымальнік нямецкага паходжання Тэафіл Гольцбэрг загарэўся ідэяй перанесці гэтую хайпавую франшызу на беларускую глебу. Так, у сярэдзіне ХІХ стагоддзя, за заходнім ускрайкам горада, ва ўрочышчы Шырокае Балота, з’явіўся парк Цівалі. Неўзабаве тут паўсталі летні тэатр, атракцыёны, рэстарацыя, сядзіба, вятрак і іншыя пабудовы. Акрамя гэтага, госці маглі пабавіцца ў бадмінтон, пракаціцца на конях ці ровары, альбо проста прагуляцца і адпачыць на свежым паветры.